پەیامی کۆمیتەی حیزب لە نۆروێژ بۆ یادی ٧٢هەمین ساڵرۆژی دامەزرانی کۆماری کوردستان

بەشدارانی خۆشەویست!
میوانانی به‌رێز، نوینەرانی حیزب و ڕێکخراوە کوردستانی، ئێرانی و نۆرویژیەکان!
ئەندامانی تێكۆشه‌ری حدکا لە وڵاتی نۆرویژ!
لە لایەن کومیتەی گشتی حدکا لە وڵاتی نۆرویژ پڕ بە دڵ بەخێرهاتنی گەرمی هەموو لایەکتان دەکەین و سوپاس و ڕیزمان هه‌یه‌ بۆ بەشداریتان لەم بۆنە به‌رز و پیرۆزه‌دا. به‌شداریتان و رێزگرتنتان لە ٢ی ڕیبەندان، ساڵوەگەڕی دامەزرانی کۆماری کوردستان، له‌ خۆێدا مانای به‌ڵێن نوێ كردنەوەیە له‌ بۆ خه‌بات و نه‌سره‌وتن تا وه‌دیهاتنی ئامانجه‌ ئینسانی و نه‌ته‌وه‌ییه‌كانی كۆمار و پێشه‌وا. هه‌رله‌م ده‌رفه‌ته‌ كه‌ڵك وه‌رده‌گرین و پیرۆزبایی ئەو ڕۆژە پیرۆزە لە هەموو خەڵکی کوردستان به‌گشتی، ئێوە بەشدارانی خۆشەویست و هەموو ئەندامان، دۆستان و لایەنگرانی حدکا و هەموو ڕۆڵەکانی گەلەکەمان دەکەین.

به‌رێزان!
ئەوڕۆ لێرە کۆبوینەتەوە تا به‌ شكۆوه‌ ئاوڕ له‌ رووداوێكی گرینگ و پڕ بایه‌خ و چاره‌نووسسازی نه‌ته‌وه‌كه‌مان بدەینه‌وه‌، كه‌ له‌ ٧٢ ساڵ له‌مه‌و پێشه‌وه بووته‌وه‌ مایه‌ی گۆڕانكاریه‌كی قووڵ و مێژووساز له‌ خه‌باتی ره‌وای گه‌لی كورد بۆ سه‌ربه‌ستی و رزگاری یه‌كجاری.
کۆماری کوردستان له‌ ٢ی ڕیبەندانی ساڵی ١٣٢٤ی هەتاوی دا له‌ سایه‌ی هه‌وڵ و هیمه‌تی تێكۆشه‌رانی كورد و به ‌رێبه‌ری پێشەوای مەزنی كوردستان و ڕێبەری حیزبی دیموكرات راگه‌یاندرا. نەمر قازی موحەممەد بە هەست بەبەرسایەتی کردنێکی مێژووی و نەتەوەیی، هه‌لی شه‌ڕی دووه‌می جیهانی و له‌رزۆكی دەسەڵاتی دیکتاتۆری و ملهوڕی پاشایەتی قۆسته‌وه‌ و شانی دایە به‌ر ئەرکێکی گرینگ و گرانی نەتەوەیی؛ كه‌ ئەویش دامەزراندنی کۆماری پڕ لە شانازی کوردستان بوو، واته‌ یه‌كه‌مین كیانی نه‌ته‌وه‌یی -_سیاسی كورد له‌ مێژووی هاوچه‌رخ دا.
دامەزراندن و ڕاگەیاندنی کۆماری کوردستان لەو سەردەمەدا کارێکی گرینگ وئەرکێکی قورس و مەترسیدار بوو كه‌ بوێری وریاییه‌كی كه‌م وێنه‌ی ده‌ویست. چوونکە هەلومەرجی ئەو کاتی كورد و كوردستان، چ لە باری سیاسی، ئابووری، کۆمەڵایەتی، كلتووری و نێونەتەوەیی گەلێک جیاواز بوو لە گەڵ ئێستا. سه‌رباری ئەوانەش کورد لە گەڵ حکومەتێکی دیکتاتۆر و خوێنڕێژ ی وەک حکومەتی پاشایەتی ڕووبەڕو بوو کە بۆ سەرکوتی کورد و موخالیفانی، دەستی لە هیچ چەشنە جینایەتێک نەدەپاراست.
باس كردن له‌ ده‌سكه‌وته‌كانی کۆمار لە ماوەی ١١ مانگ دەستەڵاتدارەتی نیشتیمانیدا زۆرن و ره‌نگه‌ باس كرنیان‌ له‌م جێژنه‌دا كارێكی نه‌گونجاو بێت ، به‌ڵام ده‌توانین به‌ دڵنیاییه‌وه‌ بڵێن كه‌ كۆمار له‌ مێژووی كورد و هه‌تا ناوچه‌ی رۆژهه‌لاتی ناوه‌راستیش دا تاكوو ئێستاش نمونه‌یه‌كی كه‌م وێنه‌یه‌.

ئه‌وه‌ی له‌ پێوه‌ندی له‌ گه‌ڵ ده‌سكه‌وته‌كانی كۆماردا ره‌نگه‌ ئێستا پتر له‌ هه‌ر كات جێی سه‌رنج و لێ فێربوون بێت، مەسەلەی گه‌شه‌ی بیر و وشیاریی نەتەوەیی و نەتەوەسازییە کە ئامانجی سەرەکی کۆمار بووە. به‌ دامه‌زرانی كۆمار ‌ بزووتنه‌وه‌ی نه‌ته‌وه‌یی كورد روویه‌كی هاوچه‌رخیانه‌ترو عه‌قڵانیتری به‌ خۆوه‌ دیت. پێشەوای نەمر لەو سەردەمەدا هەستی بە گرینگی بونیاتنانی نەتەوە و دروستکردنی دەسەڵاتێکی سیاسی کوردی کردبوو، هەربۆیە ئامانجی سەرەکی کۆمار بریتی بوو لە بونیادنانی ده‌سه‌ڵاتێكی نه‌ته‌وه‌یی كوردی تا رێگا خۆش بكات بۆ خه‌بات كردن بۆ وه‌دیهاتنی خه‌ونی له‌ مێژینه‌ی كورد واته‌، کوردستانێکی یەکپارچە و سەربەخۆ بۆ هەموو کورد لە هەر چوارپارچەی کوردستان. پێشه‌وای كۆمار ئاره‌زووی دامه‌زرانی کوردستانێک بوو کە هەموو ڕۆلەکانی کورد بێ جیاوازی ڕەگەزی، چینایەتی، جیوگرافی و کۆمەڵایەتی ،خاوه‌نی سه‌روه‌ری و ئازادی و كه‌رامه‌تی پارێزراو بن تێیدا.

کوردستانێک کە خاوەنی حکومەتیكی سیاسی و مودێرن بێت کە هەموو خەڵکی کوردستان دەنگی پێ بدەن و ده‌سه‌ڵاتدارانی ئازادانه‌ هەڵی بژێرن و لێشیان بپرسنەوە ‌و خۆیان به‌ خاوه‌نی راسته‌قینه‌ی بزانن. پێشه‌وا باش ده‌یزانی بوونی کیانێکی سەربەخۆی سیاسی پێویستی بە سوپایەکی یەکگرتووی میللییش هه‌یه‌ بۆ پاراستن و گه‌شه‌ كردنی، بۆیه‌ کۆمار لەو ماوە کورتەی دەسەڵاتی خۆیدا سوپایەكی نه‌ته‌وه‌یی دروست کرد کە بە پێی بەڵگە مێژوییەکان، کوردی هه‌موو بەشەکانی دیکەش به‌ بێ جیاوازی خزمه‌تیان تێیدا کردووە.

خوشک و برایان
پەیام و ئامانجی کۆماری کوردستان ئێستاش دوای تێپەرێنی پتر لە حەفتا ساڵ هێشتا بەدی نەهاتوون و خەبات هەروا دڕێژەی هەیە. بەڵام قۆناخی ئیستا و هەلومەرجی کورد له‌ چاو جاران زۆر گۆراوه‌ و ئێستا ئیتر كورد نه‌ته‌وه‌یه‌كی نه‌ناسرا و و ده‌نگ كپكراو نیه‌. کورد ئێستا لە بەشیکی کوردستاندا واتە له‌ باشووری كوردستان خاوه‌نی ده‌سه‌ڵاتی سیاسی _نه‌ته‌وه‌یی خۆیه‌، هەرچەند هێشتا نەیتوانیوە خەونەکانی کۆمار و پەیامە نەتەوەییەکانی کۆمار جێبەجێ بکات؟ به‌ڵام مەسەلەی کورد ئەوڕۆ بووەتە مەسەلەیەکی ناسراو و كه‌س ناتوانێ حاشایی لێبكات، ئه‌ورۆ لە نێو کۆمەڵگای نێونەتەوەییدا بە هۆی ئازایەتی پێشمەرگە و بەرگری پێشمەرگە لە خاکی کوردستان و شەڕ و گیانبازی پێشمه‌رگه‌ ، کورد ئەوڕۆ سەرنجی دونیای بۆ لای خۆی و دۆزه‌ ره‌وا و نه‌ته‌وه‌ییەکەی راكێشاوه ‌و نیشانی داوه‌ كه‌ گه‌لێكه‌ هیچ ترس و سته‌م و هه‌ره‌شه‌یه‌ك ناتوانێ به‌ چۆكی دابهێنێ. ‌

له‌ بەشەکانی دیکەی کوردستانیشن خه‌بات بۆ رزگاری كوردستان هەروا درێژەی هه‌یه‌. سەرەڕای هەموو ئەو ڕوداوە ناخۆشانەی پار بەسەر میللەتەکەمان دا هاتن، خەباتی کورد هەروا دەڕواتە پێش و کورد و بزووتنەوە رەواکەی فاکتۆرێکی کاریگەری ئاڵوگۆڕە سیاسیەکانی ناوچەیە .

لە پێوەندی لە گەڵ کوردستانی ڕۆژهەڵات ڕەنگە هەلومەرجی خه‌بات زۆر دڵخواز نه‌بێ. خەڵکی کوردستان لە ژێر زوڵم و زۆری تاقه‌تپرووكێنی ڕێژیمی دیکتاتۆری کۆماری ئیسلامیدا دەناڵینن و، ڕۆژ نییە ڕۆلەکانی ئەم گەلە لە زیندان نەکرێن یان ئیعدام نەکرێن. حکومەتی کۆماری ئیسلامی له‌ ماوه‌ی دەسەڵاتداریەتی خۆی دا هیچ ئاڵوگۆڕیکی موسبەتی به‌ قازانجی ئازادی و دیموكراسی بە سەردا نەهاتووە و، كورد هه‌ر له‌ بێبه‌شی و ماف زه‌وتكراوی دا ده‌ژی.

قه‌وڵ و به‌ڵێنیه‌ سیاسی و كولتوریه‌كانی ڕیفورمخوازەكانمان تاقی كردنه‌وه‌ و ته‌نیا درۆ و پڕو پاگه‌نده‌ و پاكانه‌ بوون بۆ جنایه‌ته‌كانی رێژیم، به‌ هاتنه‌ سه‌ركاری ئاغای ڕۆحانیش سه‌ركوت و ئیعدام و بێ مافی هه‌ر به‌رده‌وامه‌ و هەروەک جاران پرۆپاگەندەکانی کاتی بە ناوهەڵبژاردن هیچ قازانج و دەستکەوتێکی بۆ گەلی کورد بە دوادا نەهات. حیزبی ئێمە لە سەرەتای هاتنە سەرکاری ئاغای ڕۆحانی بێ دوودڵی و خۆشخه‌یالی پێی وابوو کە نابێت ئیمە وەک کورد بكه‌وینه‌ داوی شانۆسازی رێژیم و ئاڵوگۆڕ بە قازانجی کورد و دیموكراسی له‌ چواچێوه‌ی كۆماری ئیسلامیدا زۆر مەحاڵه‌، مه‌گه‌ر ئەو کاتەی ئاڵوگۆڕی بنەڕەتی و رادیكاڵ لەئێراندا روو ‌بدات. سیستمی سیاسی کۆماری ئیسلامی سیستمێکی چەقبەستوو، مەزهەبی و دیکتاتۆرییە کە ناتوانرێ چاوەڕوانی ئەوەی لێ بکرێت مافی نەتەوەکانی ئێران به‌ فه‌رمی بناسێ و به‌ چاوی به‌رابه‌ر له‌ هه‌موو گه‌لانی ئێران بنواڕێ و مافه‌كانیان وەک یەک چاو لێ بکات . هەر لە بەر ئەم هۆکارانەشە کە ئێمە بە مەسەلەی چارەسەری کێشەی کورد لە ڕۆژهەڵاتی کوردستان لە چوارچێوەی ئەو سیستەمەدا گەشبین نین. بەڵام خۆپێشاندانەکانی ئەو دواییانەی خەلكی ئێران بە دژی کۆماری ئیسلامی و پشتیوانی کۆڕوکۆمەڵە نێودەوڵەتیەکان لە و حەرەکەتە ئیعتڕازیانە، نیشانەی هاتنە کایەی قۆناخێکی تازەیە لە خاباتی گەلانی ئیران بەدژی کۆماری ئیسلامی. هیچ گومانی تێدانیە ئەگەر ئەو بزووتنەوانە بڕۆنە پێش، کوردستان وەک هەمیشە دەبێت سەنگەری دیفاع لە ئازادی و دێموکراسی هەموو ئێران و دەروازەی ڕاپەرینی سەرتاسەری و ڕاماڵینی کۆماری ئیسلامی.

خوشک و برایانی ئازیز!
حدکا هه‌موو ده‌م وەفادارە بووه‌ به‌ ئامانجەکانی کۆماری کوردستان و بەردەوام وشێلگیرانه‌ ئاڵا هەڵگر و ڕیبواری بەوەفای ڕێگای ئامانجەکانی پێشەوا و کۆمار بووه‌ . هەموو کات خوازیاری یەکڕیزی و یەکدەنگی كورد بووه‌ و بەرژەوەندی نەتەوەیی له‌ سه‌ره‌وه‌ی هه‌موو به‌رژه‌وه‌ندیه‌كانی دیكه‌ داناوه‌ و، بۆ ئەم مەبەستەش زۆر به‌ سه‌خاوه‌ته‌ ئاماده‌ی قوربانی دان بووه‌. یەکدەنگی و پشتیوانی کورد لە یەکتر و پاراستنی دەستکەوتی بەشەکانی دیکەی کوردستان و رێز گرتن له‌ سه‌ربه‌خۆی بریاری پارچه‌كانی دیكەی‌ كوردستان و ده‌ستوه‌رنه‌دان له‌ كاروباری نێوخۆیی ئەوان پرینسیپێکی جێگرتوو و بنەڕەتی حیزبی ئێمەیە. مێژووش له‌و باره‌وه‌ شاهیدێكی باوه‌ر پێكراوه‌. ئێستاش لەم کاتەدا کە ئێمە یادی ٢ی ڕێبەندان ڕیز دەگرین به‌خۆشیه‌وه‌ ماوه‌یه‌كه‌ باسی یەکڕیزی و پتەوکردنەوەی ریزه‌كانی دێموکرات به‌ گوڕ وتینێكی دڵخۆشكه‌رانه‌وه‌‌ لە ئارادایە. به‌داخه‌وه‌ ١٠ ساڵ پێش ئێستا كۆمه‌ڵێك لە کادر و پێشمەرگەکانی حدكا ڕیزەکانی حیزبیان بەجێ هێشت و خەباتی خۆیان له‌ چوارچێوه‌یه‌كی دیكه‌دا دەست پێ کرد. بەڵام کۆنگرەی ١٥ پێی وابوو كه‌ دووبه‌ره‌كی و پرش و بڵاوی و ناكۆكی تێكۆشه‌رانی دیموكرات دۆخێك پێكده‌هێنێ كه‌ ته‌نیا دوژمن قازانجی لێده‌كات؛ بۆیه‌ ڕیبەرایەتی حدكا ی راسپارد كه‌ دیالۆگ و لێک نزیکبوونەوە لە گەڵ ئەو هاوڕێیانە ده‌ست پێ بكرێته‌وه‌ و رێگای پێكهاتنه‌وه‌ و یه‌كریزی خۆش بكه‌ن و مالی گه‌وره‌ی دیموكرات یه‌كبخه‌نه‌وه‌ . بە خۆشییەوە وه‌ك دەبینین ئەو ڕەوتە ئێستا گەیوەتە قۆناغێکی نوێ .‌ به‌ پێی وته‌كانی سکرتێری گشتی حیزبەکەمان لە دوا وتووێژی خۆی لەگەڵ روداودا، هاوڕێێ بەڕێز و تێکۆشەر کاک موستەفا هیجری وتی ڕەوتی دانیشتن و باسه‌كان بەردەوامن و هەنگاوەکان به‌ باشی و دلسۆزانه‌ بۆ لیک نزیکبوونەوە و یەکگرتن جێگای دڵخۆشین. به‌و هیوایه‌ به‌ زووی مزگێنی یەکگرتن، یەکدەنگی و یەکڕیزی ماڵی کورد ودیموكرات ببێته‌ هەوێنی هه‌موو كور و كۆبوونه‌وه‌ و كار و تێكۆشانه‌كانی یه‌كگرتووانه‌مان.

ماوەتەوە بڵیین کورد ئێستا لە قۆناغێکی سەختی خەباتدایە، گەلی کورد گەورەترین نەتەوەی سەر زەوییە کە خاوەنی کیانی سەربەخۆی سیاسی خۆی نییە، تاکەکانی کورد له‌ هه‌ر چین و توێژێكی كۆمه‌ڵایه‌تی بن ئەرکیان لە سەر شانە، وه‌رن با ده‌ست له‌ نێو ده‌ست و وشیارانه‌ به‌ پیر ئه‌ركه‌كانمانه‌وه‌ بچین و هەموومان خەمخۆری گەل و نیشتمانەکەمان بین و بەرپرسانه‌ ئه‌رك وه‌ئه‌ستۆ بگرین و لە بەرەوەپێش بردنی ئەم خەباتە ره‌وایه‌دا به‌شداری چالاكانه‌ بكه‌ین.

لە کۆتاییدا جارێکی دیکە سوپاس بۆ ئامادەبونتان
سڵاو لە هەموو شەهیدانی رێگای ئازادی کوردستان، ئەوانەی کە گیانی خۆیان بەخت کرد لە پێناو مافە نەتەوەییەکانی کورد و بەرز ڕاگرتنی ئاڵای پێرۆزی کوردستان.
سڵاو لە بنەماڵەی سەربەرزی شەهیدان.
سڵاو لە ڕۆڵە بەجەرگەکانی کورد و کوردستان کە ئێستا چەکیان لە شانە بۆ بەرگری لە ئاو و خاکی کوردستان.
دیسان سڵاو لە کادر و پێشمەرگەکانی حدکا ئاڵا هەڵگرانی ئاوات و ئامانجەکانی کۆماری کوردستان.

کومیتەی حدکا لە وڵاتی نۆرویژ
رێبەندانی ٢٠١٨ ی زایینی